Page:Ludus Coventriae (1841).djvu/359

And what I xal sey therto,
  And what charge thei xal have.

Come forth, ȝe ser Amorawnt,
  And ser Arphaxat; com ner also
Ser Cosdram, and ser Affraunt,
  And here the charge that ȝe must do.
Seres, to Jhesuis grave ȝe xal go,
  Tyl that the thryd day be gon;
And lete nother frend nor fo,
  In no wey to towche the ston.

Yf ony of hese dyscipelys come ther
  To feche the body fro ȝou away,
Bete hym down, have ȝe no fere,
  With shamful deth do hym day.
In payn of ȝour godys and ȝour lyvys,
  That ȝe lete hem nowth shape ȝou fro,
And of ȝour chyldere and ȝour wyfys,
  For al ȝe lese, and ȝe do so.

Primus miles. Sere Pylat, we xal not ses
  We xal kepe it strong anow.
Secundus miles. [Gh]a, and an hunderyd put hem in pres,
  Thei xal dey, I make a vow.
Tertius miles. And han hunderyd! fy on an c. and an c. therto!
  Ther is non of hem xal us withstonde.
Quartus miles. [Gh]a, and ther com an hunderyd thowsand and mo,
  I xal hem kylle with myn honde.

Pylat. Wel, seres, than ȝour part ȝe do,
  And to ȝour charge loke ȝe take hede,
Withowtyn wordys ony mo,
  Wysly now that ȝe precede.