Page:Ludus Coventriae (1841).djvu/37

I. THE CREATION.

Deus. Ego sum alpha et ω, principium et finis.

My name is knowyn, God and kynge,
  My werk for to make now wyl I wende,
In myself restyth my reynenge,
  It hath no gynnyng ne non ende;
And alle that evyr xal have beynge,
  It is closyd in my mende,
Whan it is made at my lykynge,
  I may it save, I may it shende,
          After my plesawns.
So gret of myth is my pousté,
Alle thyng xal be wrowth be me,
I am oo God in personys thre,
          Knyt in oo substawns.

I am the trewe trenyté,
  Here walkyng in this wone;
Thre personys myself I se,
  Lokyn in me God alone.
I am the ffadyr of powsté,
  My Sone with me gynnyth gon,
My Gost is grace in magesté,
  Weldyth welthe up in hevyn tron.
          O God thre I calle,
I a fadyr of myth,
My sone kepyth ryth,
My gost hath lyth,
          And grace with alle.