Page:Ludus Coventriae (1841).djvu/41

Here is alle thinge that the xulde plese,
Alle redy made onto thin ese,
Ete not this frute ne me dysplese,
          ffor than thou deyst, thou skapyst nowth.

Now have I made alle thynge of nowth,
  Hevyn and erthe, foulle and best:—
To alle thynge that myn hand hath wrowth,
  I graunt myn blyssyng that evyr xal lest;
My wey to hefne is redy sowth,
  Of werkyng I wole the vij.^{te} day rest,
And alle my creatures that be abowth,
  My blyssyng ȝe have both est and west.
          Of werkyng the vij.^{te} day ȝe sees;
And alle tho that sees of laboryng here,
The vij^{te}. day withowtyn dwere,
And wurchyp me in good manere,
          Thei xal in hefne have endles pes.

Adam go forthe and be prynce in place,
  ffor to hefne I sped my way;
Thi wyttys wel loke thou chase,
  And gostly governe the, as I say.