Page:Ludus Coventriae (1841).djvu/77

It fyguryth sumthynge of ryght gret fame,
  I kan not seyn what it may be,
I wylle go nere, in Goddys name,
  And wysely loke this busche to se.

Deus. Moyses, how! Moyses,
  Herke to me anon this stounde.

Moyses. I am here, Lorde, withowtyn les,
  ȝowre gracyous wylle to do I am bounde.

Deus. Thu take thi schon anon ful rownde
  Of thi fete in hast, lete se,
fful holy is that place and grownde,
  Ther thou dost stonde, I sey to the.

Moyses. Barfoot now I do me make,
  And pulle of my schon fro my fete:
Now have I my schon of take,
  What is ȝour wylle, Lord? fayn wold I wete.

Deus. Com nere, Moyses, with me to mete,
  These tabelleis I take the in thin honde,
With my ffynger in hem is wrete
  Alle my lawys, thou undyrstonde.

Loke that thou preche alle abowte,
  Hoo so wylle have frenshipp of me,
To my lawys loke thei lowte,
  That thei be kept in alle degré.
Go forthe and preche anon, let se,
  Loke thou not ses nyght nor day.

Moyses. ȝour byddyng, Lord, alle wrought xal be,
  ȝour wylle to werk I walk my way.

"Custodi precepta domini Dei tui." Deutronomini vj.^{to}

The comaundment of thi Lord God, man, loke thou kepe,
  Where that thou walk, wake, or slepe,
Every man take good hede,
  And to my techynge take good intent;