hui nei. Ka tau ko te tangikura kia ākina ake ki te iwi nui, kia tau ki runga ki a tātou, tēnei te nihinihi, tēnei te nahanaha, tūturu o Whiti kia whakamaua kia tina.
(Tina)
Haumi e, hui e, tāiki e.
E te Māngai o te Whare, tēnei taku mihi tuatahi ki a koe, nāu nei i whakapūaretia tō tātou huihuinga i runga i ngā kupu karakia, nāu nei i honotia te rangi ki te whenua, te whenua ki te rangi nā reira, tēnā rā koe. Tēnā hoki koe, nā te Kāwana-Tianara i whakamanahia tō tūranga nā reira e mihi kau ana ki a koe mō tēnā tūranga.
E tika ana kia hura tātou ki te wāhi ngaro, ō tātou tini mate, ngā mate nā tātou katoa i pīkaungia ki roto i tēnei Whare. Haere ngā mate, haere. Ko tōku hoa, a Rudy Taylor, tētahi. I tērā wiki kua tukuna atu ki te kōpū o te whenua nā reira, Rudy me te tini, te mano e takoto ana kei runga i ngā marae maha puta noa i te motu. Haere e ngā mate, haere, haere atu rā.
Engari, rātou ki a rātou, te hunga wairua. Kua hoki mai ki a tātou ngā kanohi ora me ngā kaupapa kei mua i a tātou.
Tuatahi māku, e mihi kau atu ki te Pirimia, tēnā rā koe e te Rt Hon Jacinda Ardern, kourua ko the Hon Grant Robertson, te Pirimia me te Pirimia Tuarua. Kua kōrero te motu. Nā rātou i whakatau ko kourua ngā kaiwhakahaere o te motu, o te Kāwanatanga nō reira mihi kau ana ki a kourua.
Ka whakawhiti ahau ki te āpitihanga, ki te tumuaki o Te Rōpū Nahinara, the Hon Judith Collins, tēnā rā koe me tō kāhui mema e tautokongia ana ki a koe.
E te tuakana, e Shane, mihi kau ana ki a koe nāu nei i whiwhingia te Tumuaki Tuarua o Te Pāti Nahinara. Kua whakamanahia e koe ō iwi, ō hapū o Te Kapotai o Ngāti Wai nā reira tēnā rā koe mō tēnā tūranga.
Ka huri atu ki ōku whanaunga kei roto i Te Paati Māori. E Rāwiri, tēnā rā koe e te tuahine, Debbie, tēnā rā kourua. Kua kōrero hoki Te Ao Māori—kei konei hei hāpai, hei akiaki ai i ngā kaupapa Māori o te motu. Ko koutou, ko mātou hoki, e kawe ana i tēnā kaupapa nā reira tēnā rā kourua.
Ki a koe e te tumuaki o Te Rōpū ACT, David Seymour. Tēnā rā koe kua puawai tō pāti, tō rōpū, nā reira e mihi kau ana ki a koe. Mahara ake ahau i mua ake nāu nei i mea mai ki ahau tō tino hiahia kia tupu ake tō pāti, nāu nei i tinanahia tērā moemoeā anō. Nā reira, tēnā rā koe.
E te hoa, the Hon James Shaw, me te tuahine, the Hon Marama Davidson, tēnā rā kourua, ngā kaiarahi o Te Rōpū Kākariki, kua puawai hoki tō kourua rōpū nā reira e mihi kau ana ki a koutou.
Me ngā mihi hoki ki ngā Minita o mua, the Hon Eugenie Sage, the Hon Julie Anne Genter, tēnā rā kourua mō ngā mahi nā kourua i mahingia i te Pāremata o mua.
Nā reira, ngā mema hou, huri rauna, tēnā koutou.
Ki tō mātou pāti, ko Te Rōpū Reipa, tēnā rā koutou ngā mema hōu. Mihi kau ana ki a koutou i whakawhānuitia tēnei Kāwanatanga, tēnā rā koutou ngā mema o te kāhui Māori o Te Rōpū Reipa—he mahi nui kei mua i a tātou hei kawe ai i ngā moemoeā, ngā whakaaro, ngā hiahia o te iwi Māori nā reira, mihi kau ana ki a koutou me ngā Minita o te Kāhui Matua. Tēnā rā tātou, ōku hoa, Minita Māori a Peeni Henare, Willie Jackson, Nanaia Mahuta, Kiritapu Allen, Meka Whaitiri, tēnei tōku mihi ki a koutou. He mahi nui hoki kei mua i a tātou.
Nā reira, ngā āpiha o tēnei Whare, tēnā rā koutou mō ngā mahi ka mahingia koutou i ngā tau e toru kei mua i a tātou. E mihi kau ana kia koutou mō ērā mahi ka mahingia koutou.
Nā reira, ka nui ōku mihi. Huri rauna i tō tātou Whare—e te Māngai o te Whare, tēnei ahau mihi kau ana ki a tātou katoa i runga i te tūmanako ka mahi tika tātou, ka mahi tātou
