Page:New poems and variant readings, Stevenson, 1918.djvu/134

From Wikisource
Jump to navigation Jump to search
This page has been proofread, but needs to be validated.


Clinkum-clank in the rain they ride,
Down by the braes and the grey sea-side;
Clinkum-clank by stane and cairn,
Weary fa' their horse-shoe-airn!

Loud on the causey, saft on the sand,
Round they rade by the tail of the land;
Round and up by the Bour-Tree Den,
Weary fa' the red-coat men!

Aft hae I gane where they hae rade
And straigled in the gowden brooms—
Aft hae I gane, a saikless maid,
And O! sae bonny as the bour-tree blooms!

Wi' swords and guns they wanton there,
Wi' red, red coats and braw, braw plumes.
But I gaed wi' my gowden hair,
And O! sae bonny as the bour-tree blooms!

I ran, a little hempie lass,
In the sand and the bent grass,
Or took and kilted my small coats
To play in the beached fisher-boats.