C.C.C.C. c.lxxiii.
ANNALES SAXONICI.
Þy geare þe waes agán fram Cristes acennesse cccc. wintra ⁊ xciiii. uuintra · þa Cerdic ⁊ Cynric his sunu cuom up æt Cerdices oran mid v. scipum · ⁊ se Cerdic wæs Elesing · Elesa Esling · Esla Gewising · Giwis Wiging · Wig Freawining · Freawine Friþugaring · Friþugar Bronding · Brond Bældæging · Bældæg Wodening. Ond þæs ymb vi. gear þæs þe hie up cuomon geeodon West Seaxna rice · ⁊ þæt uuærun þa ærestan cyningas þe West Seaxna lond on Wealum geeodon · ⁊ he hæfde þæt rice xvi. gear · ⁊ þa he gefór þa feng his sunu Cynric to þam rice ⁊ heold xvii. winter. Þa he gefór þa feng Ceol to þam rice ⁊ heold vi. gear. Þa he gefór þa feng Ceolwulf to his broþur · ⁊ he ricsode xvii. gear · ⁊ hiera cyn gæþ to Cerdice. Þa feng Cynegils Ceolwulfes broþur sunu to rice ⁊ ricsode xxxi. wintra · ⁊ he onfeng ærest fulwihte Wesseaxna cyninga · ⁊ þa feng Cenwalh to ⁊ heold xxxi. wintra · ⁊ se Cenwalh wæs Cynegilses sunu · ⁊ þa heold Seaxburg his cuen án gear þæt rice æfter him. Þa feng Æscwine to rice þæs cyn gæþ to Cerdice · ⁊ heold ii. gear. Þa feng Centwine to Wesseaxna rice Cynegilsing · ⁊ ricsode vii. gear. Þa feng Ceadwalla to þam rice þæs cyn gæþ to Cerdice · ⁊ heold iii. gear. Đa feng Ine to Seaxna rice þæs cyn gæþ to Ceardice · ⁊ heold xxvii. wintra. Þa feng Æþelheard to þæs cyn gæþ to Ceardice · ⁊ heold xiiii. winter. Þa feng Cuþred to þæs cyn gæþ to Cerdice · ⁊ heold xvii. gear. Þa feng Sigebryht to þæs cyn gæþ to Cerdice · ⁊ heold án gear. Þa feng Cynewulf to rice þæs cyn gæþ to Ceardice · ⁊ heold xxxi. wintra. Þa feng Beorhtric to rice þæs cyn gæþ to Cerdice · ⁊ heold xvi. gear. Þa feng Ecgbryht to þam rice · ⁊ heold xxxvii. wintra · ⁊ vii. monaþ · ⁊ þa feng Æþelwulf his sunu to · ⁊ heold nigon teoþe healf gear. Se Æþelwulf wæs Ecgbryhting · Ecgbryht Ealhmunding · Ealhmund Eafing ·
