techen, they done it not but for good. But the yonge men and wymmen that ben at this day take to thys no hede, but haue grete despyte whanne they be repreued of theyr wyckednes and folye, and wene to be more wyse than the olde and auncyent folke. It is grete pyte thenne, of suche vaknowlege, for every gentylle herte and of honeste lyuynge, aughte to haue grete Loye whan he is repreued of his fawte and mysdede, and yf he be wyse and sage, he shalle thanke hym by whome he knoweth his fawte. And in this is shewen and perceyued the free kynd of the good yonge man & yong woman, for no chorlysshe nor vylayne herte shall neuer yeue thanke ne graces of it. Now haue I told to yow how thauncyent spake and chastysed the yong men, and now I shalle telle yow how they gaf good ensamples to the good ladyes & damoysels that were at that tyme.
