THE THRE ENSEYGNEMENTES OR LERNYNGES WHICHE CATHON GAF TO HIS SONE.
NOTHER ensample j will telle yow of the wyse Cathon, by whos wysedome was all the Cyte of Rome gouerned. He made & wrote many fayr auctorytees, the whiche yet as now make grete memore of hym. This Cathon had a sone, and as he was in the bedde of his deth, he callyd his sone to hym, the whiche had to name Cathonet, and sayd to hym, "Fayre sone, I have longe lyued in this world, whiche is moche hard to knowe, and moche merueyllous, and alwey shall wexe wors, as I trowe. Wherfore I wold and desyre moche that your gouernement and maner of lyuynge shold be good to the worship of yow and of all your frendes. I haue take therfore to yow by wrytynge many enseygnementes, the whiche shalle prouffyte to you herafter, yf ye therto wylle sette your herte and have them in youre memorye. Neuertheles I haue bethought in my self to telle and gyue yow other thre er i deye, wherfore I praye yow that euer ye wyll have them in your memorye.
