perylle of dethe / He thenne rendred thanke and grace to the oxen / and one of the oxen ſayd to hym / It is facyle to ſcape out of the handes of the blynd but hit is not facyle to ſcape out of the handes of hym thet ſeeth wel / For yf oure mayſter come hyther whiche hath more than an honderd eyen / Certayn thow arte deed yf he perceyue the ¶ And yf he ſee the not / certaynly thow arte ſaued / and ſhalt goo forthe on thy waye ſurely / The mayſter within a ſhort whyle after entryd in to the ſtable / And after he commaunded to vyſyte and ſee the hey / whiche was before his oxen / And hym ſelf went and taſted / yf they had ynough of hit / And as he taſted thus the heye / he felt the hornes of the herte with his hand / and to hym ſelf he ſayd / what is that that I fele here / and beynge dredeful called alle his ſeruauntes / and demaunded of the manere how the herte was come thyder / And they ſayd to hym / my lord I knowe nothynge therof / And the lord was full gladde and made the herte to be taken and ſlayne / and maade a grete feeſt for to haue ete hym / Therfore it happeth oftyme / that he whiche ſuppoſeth to flee is taken and hold within the lace or nette / For he that fleeth awey is in grete perylle / wherfore men ought wel to kepe them ſelf to doo ſuche dede / that they muſt nedes flee therfore
