¶ The ſeuenth fable is of the fawkoner and of the byrdes
He wyſe ought to kepe and obſerue
the good couceyll / And in no
wyſe they ought not to doo the
contrarye / As reherceth to vs
this fable / Of the byrdes whiche
were Ioyeful and gladde / as the prymtemps
came / by cauſe that theyr neſtes were thenne al
couerd with leues / And Incontynent they beheld
and ſawe a fawkoner whiche dreſſyd and
leyd laces and nettes for to take them / ¶ And
thenne they ſayd al to gyder / Yonder man hath
pyte of vs / For whanne he beholdeth vs he
wepeth / ¶ And thenne the pertryche / whiche
had experymented and aſſayed all the deceytes
of the ſayd Fawkoner / ſayd to them / kepe yow
alle wel fro that ſayd man and flee hyghe in to
the ayer / For he ſeketh nothynge / but the
manere for to take yow / or to the markette he
ſhalle bere yow for to be ſold / And they that
byleuyd his couceylle were ſaued / And they
that byleuyed it not were taken and loſt / ¶ And
therfore they whiche byleue good councylle are
delyuerd oute of theyr peryles / And they whiche
byleue it not ben euer in grete daunger
