thenne the Hunter lepte forthwith vpon the hors backe / And the hors beganne to renne after the herte / And whanne the herte ſawe / hym come he fled / And by cauſe that the hert ranne faſter / than the hors did / he ſcaped fro them / and ſaued hym / ¶ And thenne when the hors ſawe and felte hym moche wery / and that he myght no more renne / he ſayd to the hunter in this manere / alyght fro my back / For I may bere the no more and haue myſt of my proye / Thenne ſayd the hunter to the hors Syth thow arte entryd in to my handes / yet ſhalt not thow eſcape thus fro me / thow haſt the brydel in thy mouthe wherby thow mayeſt be kepte ſtylle and arreſted / And thow wylt lepe / the fadell ſhalle ſaue me / And yf thow wylt caſte thy feet fro the / I haue good ſpores for to conſtrayne and make the goo whether thow wylt or not where as I wylle haue the / And therfore kepe the wel / that thow ſheweſt not thy ſelf rebelle vnto me / ¶ Therfore it is not good to put and ſubmytte hym ſelf vnder the handes of other wenynge therby to be auenged of hym / ageynſte whome men haue enuye / For who ſubmytteth hym ſelf vnder the myght of other / he byndeth hym ſelf to hym
