¶ The xv fable is of the man and of the lyon /
En ought not to byleue the paynture /
but the trouthe and the dede /
As men may ſee by this preſent
Fable / Of a man & of a lyon
whiche had ſtryf to gyder & were
in grete diſcenſion for to wete and knowe /
whiche of them bothe was more ſtronger /
¶ The man ſayd that he was ſtronger than the
lyon / And for to haue his ſayenge veryfyed /
he ſhewed to the lyon a pyctour / where as a
man had vyctory ouer a lyon / As the pyctour of
Sampſon the ſtronge ¶ Thenne ſayd the lyon
to the man / yf the lyon coude make pyctour
good and trewe / hit had be herin paynted /
how the lyon had had vyctorye of the man /
but now I ſhalle ſhewe to the very and trewe
wytneſſe therof / The lyon thenne ledde the
man to a grete pytte / And there they fought
to gyder / But the lyon caſte the man into the
pytte / and ſubmytted hym in to his ſubiection
and ſayd / Thow man / now knoweſt thow alle
the trouthe / whiche of vs bothe is ſtronger /
¶ And therfore at the werke is knowen the beſt
and moſt ſubtyle werker /
