hete / that alle the goodes ſowen on the erthe ſhall peryſſhe But byleue not hym / to whome thow haſt done ony euylle / ¶ And withoute ſayenge ony word / the labourer wente / and thought on the wordes of the Serpent / ¶ And wenynge / that the Serpent hadde ſoo ſayd for to deceyue hym / he ſowed as moche corne and other graynes / as he myght / ¶ And it happed that the Somer next folowynge was ſuche / as aboue is ſayd / Therfor the man was begyled / ¶ For he gadred that ſame yere nothynge / ¶ And the next yere after folowynge / the ſayd ſeaſon as the poure labourer wente ageyne for to ere and cultyue his ground the ſerpent ſawe hym come fro ferre / ¶ And as he came and paſſed before his repayre he aſked of the labourer in ſuche maner / ¶ My friend whyther gooſt thow / And the labourer anſuered / I goo cultyue and ere my ground / ¶ And thenne the ſerpent ſeyd to hym / My Frend ſowe not to moche ne to lytyl of corne and of other graynes / but ſowe bytwene bothe / Neuertheles byleue not hym / to the whiche thou haſt done euyl ¶ And I telle the that this yere ſhalle be the most temperate and the mooſt fertyle of alle maner of corne / that euer thow ſaweſt / And whanne the labourer hadde herd theſe wordes / he wente his waye / and dyd as the Serpent had ſayd /
