sauf only that ye ſhalle leue the heed and the feet / And thenne lete hym gone his way to seche his auenture / And forthwith whan ye ſhalle haue that ſkynne / al hot and warme ye ſhal do bynd hit al aboute your bely / And after that or lytyll tyme be paſſed / your helthe ſhalle be reſtored to yow / and ye ſhal be as hole as euer in your lyf ye were / ¶ And thenne the foxe toke his leue of the kynge / and departed / and wente ageyne in to his terryer / ¶ Soone after came then the wulf for to ſee the lyon / And Incontynent the lyon called hym to counceylle / and caſtynge ſoftly his feet vpon hym dyſpoylled the wulf of his ſkynne ſauf the ſkynne of his hede and of his feet / And after the lyon bound it al warme about his bely / ¶ And the wulf ranne aweye ſkynles / wherfore he had ynough to doo to defende and put from hym the flyes / whiche greued hym ſore / And for the grete deſtreſſe that he felte by cauſe of the flyes / that thus ete his fleſſhe / he as wood beganne to renne / and paſſyd vnder an hylle / vpon the whiche the foxe was / ¶ And after whanne the foxe ſawe hym / he beganne to crye / and calle / lawhyng after the wulf / and mocked / and ſayd to hym / who arte thow that paſſeſt there before with ſuche a fayre hood on thy heed and with ryght fayr glouues in thyn handes / Herke herke / what I
