anone after he fond a grete pyece of bakon wel ſalted / the whiche he tourned and retourned vp ſodoune / And whan he had torned and returned hit longe / ynough / he ſayd / I dayne not to ete of this mete / by cauſe that hit ſhold cauſe me for to drynke moche / for it is to ſalte And as myn ers ſonge to me laſt I ſhalle ete this ſame day better and more delycious mete / ¶ And thenne he beganne to walke ferther / And as he entryd in to a fayr medowe / he ſawe a mare / and her yong foole with her / and ſayd to hym ſelf alone / I rendre thankes and graces to the goddes of the godes that they ſend me / For wel I wyſt and was certayne / that this daye I ſhold fynde ſomme precious mete / And thenne he came nyghe the mare and ſayd to her / Certaynly my suster I ſhalle ete thy child / And the mare anſuerd to hym / My broder doo what ſomeuer hit ſhalle pleaſe the / But fyrſt I praye the that one playſyre thow wylt do to me / I haue herd ſaye that thow art a good Cyrurgyen / wherfore I praye the / that thou wylt hele me of my foote / I ſaye to the my good broder / that yeſter daye as I wente within the foreſt / a thorne entryd in to one of my feet behynd / the whiche greueth me ſore / I praye the / that or thow ete my fool / thow wylt drawe and haue it oute of my foote / And the wulf anſwerd to the mare that ſhalle I doo gladly my good ſuſter/ ſhewe me
