¶ And thenne the wulf ſayd to hym / yf thow wylt I ſhall gyue to the yet better counceylle / And the dogge anſuerd hym with ryght a good wylle I ſhalle here hit / And yf hit be good I ſhalle do after hit / ¶ Thenne ſayd the wulf to hym Lete me take yet another lambe / and doo thy dylygence for to haue hit fro me / and to byte me / and I ſhalle ouerthrowe the thy feet vpward / as he that hath no puyſſaunce ne ſtrength withoute hurtynge of thy ſelf / byleue me hardyly / and wel hit ſhalle happe to the / And whanne thy mayſters ſeruaunts ſhalle haue ſene thy dylygence / they fhal ſhewen hit to thy mayſter how that thow ſhal kepe ful wel his folde / yf thow be wel nouryſſhed / ¶ And thenne the dogge anſuerd to the wulf that he was contente / And as hit was ſayd / ryght ſo hit was done / and bothe of them maad good dylygence The wulf bere aweye the lambe / and the dogge renne after hym / and ouertook hym / & bote hym fayntly / And the wulf ouerthrewe the dogge vpſodoune to the ground / And whan the ſheepherdes ſawe gyue ſuche ſtrokes amonge the dogge & the Wulf / ſayd Certaynly we haue a good dogge / we muſte telle his dylygence to our mayſter / and ſoo they dyd / & how he bote the wulf / and how he was ouerthrowen / And yet ſayd Certaynly yf he hadde
