whan the tyme of childynge ſhold come / that ſhe ſhold make her yong Egles within his boſome / And thenne whanne the weſel knewe this / ſhe gadred and aſſembled to gyder grete quantite of ordure of fylthe / and therof made an hyghe hylle for to lete her ſelf falle fro the top of hit in to the boſome of Jupiter / And whanne Jupiter felte the ſtenche of the fylthe / he beganne to ſhake his boſome / and both the weſel and the egges of the egle felle doune to the erthe / And thus were alle the egges broken and loſt / And whanne the Egel knewe hit / ſhe made auowe / that ſhe ſhold neuer make none egles / tyll of the weſel ſhe were aſſuerd / And therfore none how ſtronge and myghty that he be / ought not deſpreyſe ſomme other / For there is none ſoo lytyl / but that fomtyme he may lette and auenge hym ſelf / wherfore doo thow ne deſplayſyr to none / that deſplayſyre come not to the
