¶ The tenth fable is of the child / whiche kepte the ſheep
E whiche is acuſtomed to make leſynges /
how be it that he ſaye
trouthe / Yet men byleue hym
not / As reherceth this fable / Of
a child whiche ſomtyme kepte
ſheep / the whiche cryed ofte withoute cauſe /
ſayenge / Allas for goddes loue ſocoure yow me /
For the wulf wylle ete my ſheep / And whanne
the labourers that cultyued and ered the erthe
aboute hym / herd his crye / they come to helpe
hym / the whiche came ſo many tymes / and fond
nothyng / And as they ſawe that there were no
wulues / they retorned to theyr labourrage / And
the child dyd ſo many tymes for to playe hym /
¶ It happed on a day that the wulf came / and
the child cryed as he was acuſtomed to doo /
And by cauſe that the labourers ſuppoſed / that
hit had not ben trouthe / abode ſtylle at theyr
laboure / wherfore the wulf dyd ete the ſheep /
For men bileue not lyghtly hym / whiche is
knowen for a lyer