¶ The xxiiij fable is of the goos and of her lord
E that ouer ladeth hym ſelf / is
euylle ſtrayned / As this fable
ſayeth / of a man / whiche had
a goos / that leyd euery day an
egge of gold / The man of
auaryce or couetouſnes commaunded and bad
to her / that euery daye ſhe ſhold leye two
egges / And ſhe ſayd to hym / Certaynly / my
mayſter I maye not / wherfore the man was
wrothe with her / and ſlewe her / wherfore he
loſt that ſame grete good / of the whiche dede
he was moche ſorowful and wrothe / how be
it that it was not tyme to ſhette the ſtable
whan the horſes ben loſte / & gone/ And he
is not wyſe whiche does ſuch a thynge / wherof
he ſhalle repente hym after ward / ne healſo /
whiche doth his owne dommage for to auenge
hym ſelf on ſomme other / For by cauſe that
he ſuppoſeth to wynne al / he leſeth all that
he hath.