¶ The xviij fable is of the wulf / of the foxe / and of the ape
E that ones falleth in to ſomme euylle faytte or dede / he ſhalle euer lyue with deſhonour and in ſuſpecion / of the peple / ¶ And how be it that by aduenture he purpoſed to doo ſomme prouffitable thynge to ſomme other / yet he ſhold not be truſted ne byleued / wherof Eſope reherceth to vs ſuche a fable / Of a wulf whiche maade the foxe to be cyted before the Ape / ¶ And the wulf ſayd that the foxe was but a theef and a payllart and a knaue of poure folke / And the foxe ſayd that he lyed / and that he was a good and trewe man / And that he dyde moche good /
¶ And thenne the Ape whiche was ſette as a Juge / gaf ſuche a ſentence / and ſayd to the wulf / Come hyther / thow haſt not loſt al that whche thow demaundeſt / ¶ And thow Foxe I beleue wel that thow haſt vſurped and robbed ſom thynge / howe be it / that thow denyeſt hit in Juſtyce / But for as moche that pees may be bytwexe yow bothe / ye ſhalle parte to gyder