Page:The poetical works of Robert Burns.djvu/45

From Wikisource
Jump to navigation Jump to search
This page has been proofread, but needs to be validated.

POEMS.


THE TWA DOGS.

A TALE.

'Twas in that place o' Scotland's isle,
That bears the name o' Auld King Coil,
Upon a bonie day in June,
When wearing thro' the afternoon,
Twa dogs, that were na thrang at hame,
Forgather'd ance upon a time.
The first I'll name, they ca'd him Cæsar,
Was keepit for his Honour's pleasure:
His hair, his size, his mouth, his lugs,
Shew'd he was nane o' Scotland's dogs;
But whalpet some place far abroad,
Whare sailors gang to fish for Cod.
His locked, letter'd, braw brass collar,
Shew'd him the gentleman and scholar;
But tho' he was o' high degree,
The fient a pride nae pride had he;
But wad hae spent an hour caressin,
Ev'n wi' a tinkler-gipsey's messin.
At kirk or market, mill or smiddie,
Nae tawted tyke, tho' e'er sae duddie,
But he wad stan't, as glad to see him,
An' stroan't on stanes and hillocks wi' him.
The tither was a ploughman's collie,
A rhyming, ranting, raving billie,
Wha for his friend and comrade had him,
An' in his freaks had Luath ca'd him,
After some dog in Highland sang,
Was made lang syne, Lord knows how lang.
He was a gash an' faithfu' tyke,
As ever lap a sheugh or dike.
His honest, sonsie, baws'nt face,
Ay gat him friends in ilka place;
His breast was white, his touzie back
Weel clad wi' coat o' glossy black;
His gawcie tail, wi' upward curl,
Hung owre his hurdies wi' a swirl.