21. And he says to her, "What wad ye?" Quo' she till him, "Commaun that thir my twa sons may sit, the ane on thy richt haun, and the ither on thy left haun, i' thy Kingdom!"
22. But Jesus answer't and said, "Ye kenna what ye seek! Are ye fit to drink o' the cup I am to drink o'?" They say till him, "We are fit!"
23. He says to them, "Ye sal truly drink my cup; but to sit on my richt haun and on my left haun, isna mine to gie, but to thae my Faither has prepar't it for."
24. And the Ten, hearin it, war unco angry again the twa brithers.
25. But Jesus ca'd them till him, and said, "Ye a' ken hoo the rulers o' the nations lord it ower[1] the folk, and their great anes exerceese authoritie amang them;
26. "But sae it sanna be amang you; but whasae wad be heigh amang ye, lat him be yere servitor;
27. "And whasae wad be first amang ye, let him be yere thirlman.
28. "E'en as the Son o' Man camna to be ser't, but to ser'; and to gie up his life a ransom for mony."
29. And whan they gaed on frae Jericho, a great crood follow't him.
30. And lo! twa blin' men, sittin by the wayside, whane'er they kent that Jesus gaed by, cry't out, "Lord, hae mercie on us, thou Son o' Dauvid!"
31. And the folk challenged them, that they soud haud their whisht. But they skreigh't out the mair, "Lord, hae mercie on us, thou Son o' Dauvid!"
32. And, comin till a staun, Jesus ca'd them; and said, "What is't ye wad hae me do for ye?"
33. They say till him, "Lord, that oor een micht be unsteekit!"
34. And Jesus, led wi' compassion, touched their een; and at ance they wan their sicht; and they follow't him.
CHAPTIR TWENTY-ANE.
The entry intil Jerusalem. The feckless fig-tree. The ill-deedie gardeners.
AND whan they wan nar Jerusalem, and war come till Bethphage, at the Mount o' Olives, Jesus sent forrit twa o' his disciples.
2. Sayin to them, "Gang yere ways to the toun fornent ye, and ye sal fin' at ance an ass tether't, and a cowt wi' her; lowse them, and lead them to me.
3. "And gin ony ane challenge ye, say, 'The Lord has need p' them;' and at ance they wull send them."
4. Noo this was sae, that it soud be fulfilled that was said by the prophet:
5. "Tell ye Zion's dochter. Tak tent! thy King comes to thee, lowly, and ridin on an ass; and a cowt, the foal o' a toilin ass."
6. And the disciples, doin as Jesus appointit them,
7. Fesh'd the ass and the cowt, and they laid on their mantles; and he sat thar-on.
8. And a hantle o' the thrang spread their mantles i' the way; ithers cuttit branches frae the trees, and strinkled them i' the way.
9. And a' the folk that gaed on afore, and they that cam ahint, cry't, sayin, "Hosanna to the Son o' Dauvid! Blessed is he comin i' the name o' the Lord! Hosanna i' the heighest Heevens!"
10. And when he was come tae Jerusalem, a' the citie was putten aboot, speirin, "Wha is this?"
11. And a' the folk said, "This is Jesus the Prophet—frae Nazareth o' Galilee!"
12. And Jesus gaed intil the Temple, and drave oot a' that sell't and bocht i' the Temple, and whamml't ower the tables o' the nifferers
- ↑ 1V. 25. The text isna very clear; but it means that rulers tak authoritie owre their sin folk: a thing Christ's disciples are no to do.
