Six popular Scotch songs/The Braes O' Gleniffer

SONGS.

THE BRAES O’ GLENIFFER.

Keen blaws the wind o'er the braes o' Gleniffer,
⁠The auld castle's turrets are covered wi' snaw—
How chang'd frae the time when I met wi’ my lover,
⁠Amang the broom bushes by Stanley green shaw!
The wild flowers o’ summer were spread a' sae bonnie,
⁠The mavis sang sweet frae the green birken tree;
But far to the camp they ha'e marched my dear Johnnie,
⁠And now it is winter wi' nature and me.
Then ilk thing around us was blythesome and cheerie—
⁠Then ilk thing around us was bonnie and braw;
Now naething is heard but the wind whistling dreary,
⁠And naething is seen but the wide spreading snaw.
The trees are a’ bare, and the birds mute and dowie,
⁠They shake the cauld drift frae their wings as they flee,
And chirp out their plaints, seeming wae for my Johnnie—
⁠'Tis winter wi’ them, and 'tis winter wi' me.

Yon cauld sleety cloud skiffs alang the bleak mountain,
⁠And shakes the dark firs on the steep rocky brae,
While down the deep glen bawls the snaw-flooded fountain,
⁠That murmured sae sweet to my laddie and me.
’Tis no its loud roar on the wintry wind swelling,
⁠'Tis no the cauld blast brings the tears i’ my e’e—
For, O! gin I saw but my bonnie Scots callan,
⁠The dark days o' winter were summer to me.