The Black-bird/I lo'd ne'er a Laddie but ane

by Anonymous

For other versions of this work, see [[]].

I lo’ed ne’er a laddie but ane.

I lo’ed ne’er a laddie but ane.
 He lo’ed ne’er a laddie but me:
He’s willing to mak me his ain,
 And his ain I am willing to be.
He has coft me a rocklay o’ blue,
 And a pair o’ mittens o’ green;
The price was a kiss o’ my mou’,
 And I paid him the debt yestreen.

Dear Lassie, he cries wi' a jeer,
 Ne’er heed what the auld anes will say;
Tho’ we’ve little to brag o’—ne’er fear,
 What’s gowd to a heart that is wae?
Our Laird has baith honours and wealth,
 Yet see how he’s dwining wi’ care:
Now we, tho’ we’ve naithing but health,
 And cantie and loil evermair:

He ends wi’ a kiss and a smile—
 Waes me! can I tak it amiss?
My laddie’s unpractis’d in guile,
 He’s free ay to daut and to kiss!
Ye lasses wha lo'e to lament
 Your wooers wi’ fause scorn and strife,
Play your pranks—I ha’e gi’en my consent,
 And this night I am Jamie’s for life

 

---

---