Fleuron from 'The Bonny Lassie's Plaidy Awa', an undated chapbook printed in Stirling
THE BONNY LASSIE'S PLAIDY AWA.
Frae flesher Rab that liv'd in Crieff, A bonny bonny lassie, came to buy some beef, He took her in his arms, and down she did fa', And the wind blew the bonny lassie's plaidy awa.
Her plaidy awa, her plaidy awa, The wind blew the bonny lassie's plaidy awa, He took her in his arms, and down she did fa', And the wind blew the bonny lassie's plaidy awa.
The plaidy was lost and couldna be fun', Tho deil's in the plaid, its awa wi' the win', But what shall I say to the auld fo'ks ava, I darena say the wind blew the plaidy awa.
It was no long after the plaidy was lost, Till the bonny lassie grew thick in the waist, And Rabby was blam'd for the hale o' it a', And the wind blawing the bonny lassie's plaidy awa.
Then Rabby was summon'd to answer the session, They a' cry'd out ye maun mak' a confession, But Rabby ne'er answer'd them ae word ava, But the wind blew the bonny lassie's plaidy awa.
The auld wife cam' in, poor Rabby to accuse, The Ministers and Elders began to abuse, Poor Rabby for trying to mak' ane into twa, But Rab said the wind blew the plaidy awa.
The lassie was sent for to come there hersel', She looks in his face, says ye ken how I fell, And ye had the cause o't, ye darena say na, 'Twas then that the wind blew the plaidy awa.
Rab looks in her face, and gied a bit smile, He says my bonny lassie, I winna you beguile, The Minister is here he'll mak' ane o' us twa, That will pay the plaid that the wind blew awa.
The whisky was sent for to mak' a' things right, The Minister and Elders they sat a' the night, And lang before the cock began for to craw, The wind blew the bonny lassie's plaidy awa.
Now Rab and his lassie are join'd land in hand, They live as contented as ony in the land, And when he gets fu', he minds o' the fa', And sings the wind blew the bonny lassie's plaidy awa.
