The Book of Scottish Song/I'll no wake

I’ll no wake.

[James Hogg.]

O, mother, tell the laird o't,
⁠Or sairly it will grieve me, O,
That I'm to wake the ewes the night,
⁠And Annie's to gang wi' me, O.
I'll wake the ewes my nicht about,
⁠But ne'er wi' ane sae saucy, O,
Nor sit my lane the lee-lang night
⁠Wi' sic a scornfu' lassie, O:
⁠I'll no wake, I'll no wake,
⁠I'll no wake wi' Annie, O;
⁠Nor sit my lane o'er night wi' ane
⁠Sae thraward an' uncanny, O!

Dear son, be wise an' warie,
⁠But never be unmanly, O;
I've heard ye tell another tale
⁠Of young an' charming Annie, O.
The ewes ye wake are fair enough,
⁠Upon the brae sae bonny, O;
But the laird himsel' wad gi'e them a'
⁠To wake the night wi' Annie, O.
⁠He'll no wake, he'll no wake,
⁠He'll no wake wi' Annie, O;
⁠Nor sit his lane o'er night wi' ane
⁠Sae thraward an' uncanny, O!

I tauld ye ear', I tauld ye late,
⁠That lassie wad trapan ye, O;
An' ilka word ye boud to say
⁠When left alane wi' Annie, O!
Take my advice this night for ance,
⁠Or beauty's tongue will ban ye, O,
An' sey your leal auld mother's skill
⁠Ayont the muir wi' Annie, O.
⁠He'll no wake, he'll no wake,
⁠He'll no wake wi' Annie, O.
⁠Nor sit his lane o'er night wl' ane
⁠Sae thraward an' uncanny, O!

The night it was a simmer night,
⁠An' oh! the glen was lanely, O,
For just ae sternie's gowden e'e
⁠Peep'd o'er the hill serenely, O.
The twa are in the flow'ry heath,
⁠Ayont the muir sae flowy, O,
An' but ae plaid between them baith,
⁠An' wasna that right dowie, O?
⁠He maun wake, he maun wake,
⁠He maun wake wi' Annie, O;
⁠An' sit his lane o'er night wi' ane
⁠Sae thraward an' uncanny, O!

Neist morning at his mother's knee
⁠He blest her love unfeign'dly, O;
An' aye the tear fell frae his e'e,
⁠An' aye he clasp'd her kindly, O.
"Of a' my griefs I've got amends,
⁠In yon wild glen sae grassy, O;
A woman only woman kens,—
⁠Your skill has won my lassie, O.
⁠I'll aye wake, I'll aye wake,
⁠I'll aye wake wi' Annie, O,
⁠An' sit my lane ilk night wi' ane
⁠Sae sweet, sae kind, an' canny, O!"

---