The Book of Scottish Song/Our gudeman's an unco body

From Wikisource
Jump to navigation Jump to search
The Book of Scottish Song (1843)
edited by Alexander Whitelaw
Our gudeman's an unco body
2269284The Book of Scottish Song — Our gudeman's an unco body1843

Our gudeman's an unco body.

[Thomas Dodd.—Here first printed. Tune, "Oh, are ye sleeping, Maggy."]

Our gudeman's an unco body,
Our gudeman's an unco body,
Ilka plack that he can mak',
He'd drink an' mair than that,—'tweel wad he!

I wrought an' toil'd to buy a cleuk.
When I had just ae groat to win o't,
I hid it in the aumery neuk,
Fu' glad to think he wadna ken o't.

Oh, he's an unco body,
Oh, he's a drouthy body;
He drank it, sirs, and pawn'd my purse,
Tho' my auld cleuk is wearing duddy.

But when he fu' comes hame at e'en,
He's sic a takin' gate aye wi' him,
I sigh and think on what he's been,
I flyte awee, an' just forgi'e him.

Though he's an unco body,
Oh, he's a kindly body,
The wee drap maut is a' his faut—
I like a drap mysel' in toddy.

Twa score an' ten has cool'd his bluid,
And whiles he needs a drap to warm him,
But when he tak's 't to do him guid,
He whiles forgets, and tak's 't to harm him.

Though he's an unco body,
O he's a takin' body,
Ilka year mak's him mair dear,
Though it may mak' his cheek less ruddy.

When twa ha'e wrought, an' twa ha'e fought
For thretty year sae leal thegither,
A faut or flaw is nought ava',
They may weel gree wi' ane anither.

Though he's an unco body,
O he's a loving body,
For a' that's gane he's aye my ain,
An' I maun just his failing study.