The Book of Scottish Song/The tither morn

The tither morn.

[Written by Burns to a Gaelic air, and contributed to the Museum. The second strain of the tune strongly resembles the second part of "Fee him, father, fee him."]

⁠The tither morn,
⁠When I forlorn,
Aneath an aik sat moaning,
⁠I did na trow,
⁠I'd see my Jo,
Beside me gin the gloaming.
⁠But he sae trig,
⁠Lap o'er the rig,
And dawtingly did cheer me.
⁠When I, what reck,
⁠Did least expec',
To see my lad so near me.

⁠His bonnet he,
⁠A thought ajee,
Cock'd sprush when first he clasp'd me;
⁠And I, I wat,
⁠Wi' fainness grat,
While in his grips he press'd me.
⁠Deil tak' the war!
⁠I late and air,
Ha'e wish'd since Jock departed,
⁠But now as glad
⁠I'm wi' my lad,
As short syne broken-hearted.

⁠Fu' aft at e'en
⁠Wi' dancing keen,
When a' were blythe and merry,
⁠I cared na by
⁠Sae sad was I
In absence o' my dearie.
⁠But, praise be blest,
⁠My mind's at rest,
I'm happy wi' my Johnny;
⁠At kirk and fair,
⁠I'se aye be there,
And be as canty's ony.

---