The Book of Scottish Song/Wifie and me

Wifie and me.

[J. G. Cumming.]

Oh, cozzy, cozzy i' the neuk,
⁠My wifie sits wi' me;
We heedna winter's surly look,
⁠Nor hoo the minits flee;
But happy by each ithers side,
⁠The ingle bleezin' bricht,
Her wee bit tongie's winnin' wile
⁠Mak's short the langest nicht.

For wifie is as sweet as morn,
⁠An' blythe as day her e'e,
An' fairest flower upo' the thorn
⁠Is na mair fair than she.
Her bozy's whiter than the snaw,
⁠An' kinder than the doo,
Her cheeks are redder than the haw,
⁠An' sweeter far her mou'.

Syne what mair need a body want;
⁠Has earth ocht mair tae gi'e?
A bein wee wife's the bliss o' life—
⁠Is bliss eneuch for me.
Sae, when declinin' years come on,
⁠We'll totter down the brae;
Happy to think o' years by gane,
⁠Content to heaven we'll gae.

---