The Exeter Book (Jebson)/Deor
 | This page does not provide {{Header}} information. If you'd like to help, add a comment, or edit the page and replace "{{no header}}" with the following and fill in at least the title and author fields:
{{header
| title =
| author =
| translator =
| section =
| previous =
| next =
| year =
| notes =
}}
|
 | This work may need to be standardized using Wikisource's style guidelines. If you'd like to help, please review the help pages. |
Ƿelund him be ƿyrman ƿræces cunnade,
anhydiȝ eorl earfoþa dreag,
hæfde him to ȝesiþþe sorȝe and lonȝaþ,
ƿintercealde ƿrace, ƿean oft onfond
siþþan hine Niðhad on nede leȝde,
sƿoncre sconobende on syllan monn.
Ðæs ofereode, þisses sƿa mæȝ.
Beadohilde ne ƿæs hyre broðra deaþ
on sefan sƿa sar sƿa hyre sylfre þinȝ,
þæt heo ȝearolice onȝietan hæfde
þæt heo eacen ƿæs; æfre ne meahte
þriste ȝeþencan hu ymb þæt scolde.
Ðæs ofereode, þisses sƿa mæȝ.
Ƿe þæt Mæðhilde mona ȝefruȝnon
ƿurdon ȝrundlease Ȝeates friȝe,
þæt hi seo sorȝlufu slæp ealle binom.
Ðæs ofereode, þisses sƿa mæȝ.
Ðeodric ahte þritiȝ ƿintra
Mærinȝa burȝ; þæt ƿæs moneȝum cuþ.
Ðæs ofereode, þisses sƿa mæȝ.
Ƿe ȝeascodan Eormanrices
ƿylfenne ȝeþoht; ahte ƿide folc
Ȝotena rices; þæt ƿæs ȝrim cyninȝ.
Sæt secȝ moniȝ sorȝum ȝebunden,
Ƿean on ƿenan, ƿyscte ȝeneahhe
þæt þæs cynerices ofercuman ƿære.
Ðæs ofereode, þisses sƿa mæȝ.
Siteð sorgceariȝ, sælum bidæled,
on sefan sƿeorceð, sylfum þinceð
þæt sy endeleas earfoða dæl,
mæȝ þonne ȝeþencan þæt ȝeond þas ƿoruld
ƿitiȝ Dryhten ƿendeþ ȝeneahhe,
eorle moneȝum are gesceawað,
ƿislicne blæd, sumum ƿeana dæl.
Ðæt ic bi me sylfum secȝan ƿille,
þæt ic hƿile ƿæs Heodoninȝa scop,
dryhtne dyre; me ƿæs Deor noma.
Ahte ic fela ƿintra folgað tilne,
holdne hlaford, oþ þæt Heorenda nu,
leoðcræftiȝ monn, londryht ȝeþah
þæt me eorla hleo ær ȝesealde.
Ðæs ofereode, þisses sƿa mæȝ.