The Lover's Songster/Green grow the Rashes, O

From Wikisource
Jump to navigation Jump to search
For other versions of this work, see Green Grow the Rashes.
2370228The Lover's Songster — Green grow the Rashes, ORobert Burns

Green grow the Rashes, O.


Green grow the rashes, O:
Green grow the rashes, O:
The sweetest hours that e'er I spend,
Are spent among the lasses, O.

THERE's nought but care on ev'ry han',
In ev'ry hour that passes, O;
What signifies the life o' man,
An' 'twere na for the lasses, O.
Green grow, &c.

The warl'y race may riches chase,
An riches still may fly them, O;
An' tho; at last they catch them fast,
Their hearts can ne'er enjoy them, O.
Green grow, &c.

But gi'e me a canty hour at e'en,
My arms about my dearie, O;
An' warl'y cares, and war'ly men,
May a' gae tapsalteerie, O!
Green grow, &c.

For you, sae doule, ye sneer at this,
Ye're nought but senseless asses, O:
The wisest man the warl' e'er saw,
He dearly lov'd the lasses, O.
Green grow, &c.

Auld Nature swears, the lovely dears,
Her noblest work she classes, O;
Her 'prentice han' she tried on man,
An' then she made the lasses, O.
Green grow &c.