The Poetical Works of Robert Burns/For a' that and a' that

by Robert Burns (1759-1796)

For other versions of this work, see A Man's a Man for A' That.

FOR A' THAT AND A' THAT.

Is there, for honest poverty,
That hangs his head, and a' that?
The coward-slave, we pass him by,
We dare be poor for a' that!
For a' that, and a' that,
Our toils obscure, and a' that;
The rank is but the guinea stamp ;
The man's the gowd for a' that.

What tho' on hamely fare we dine,
Wear hodden-grey, and a' that;
Gie fools their silks, and knaves their wine,
A man's a man for a' that.
For a' that, and a' that,
Their tinsel show, and a' that;
The honest man, tho' e'er sae poor,
Is King o' men for a' that.

Ye see yon birkie, ca'd a lord,
Wha struts, and stares, and a' that;
Tho' hundreds worship at his word,
He's but a coof for a' that:
For a' that, and a' that,
His riband, star, and a' that,
The man of independent mind,
He looks and laughs at a' that.

A prince can mak a belted knight,
A marquis, duke, and a' that;
But an honest man's aboon his might,
Guid faith he mauna fa' that!
For a' that, and a' that,
Their dignities, and a' that,
The pith o' sense, and pride o' worth,
Are higher rank than a' that.

Then let us pray that come it may,
As come it will for a' that;
That sense and worth, o'er a' the earth,
May bear the gree, and a' that.
For a' that, and a' that,
It's coming yet, for a' that,
That man to man, the warld o'er,
Shall brothers be for a' that.