The Poetical Works of Robert Burns/I'll kiss thee yet

by Robert Burns (1759-1796)

I'LL KISS THEE YET.

TUNE—'THE BRAES O' BALQUHIDDER.'

Chorus.
I'll kiss thee yet, yet,
An' I'll kiss thee o'er again,
An' I'll kiss thee yet, yet,
My bonie Peggy Alison!

Ilk care and fear, when thou art near,
I ever mair defy them, O;
Young Kings upon their hansel throne
Are no sae blest as I am, O!
I'll kiss thee, &c.

When in my arms, wi' a' thy charms,
I clasp my countless treasure, O;
I seek nae mair o' Heaven to share,
Than sic a moment's pleasure, O!
I'll kiss thee, &c.

And by thy een sae bonie blue,
I swear I'm thine for ever, O;—
And on thy lips I seal my vow,
And break it shall I never, O!
I'll kiss thee, &c.