The Poetical Works of Robert Burns/I see a Form, I see a Face

by Robert Burns (1759-1796)

For other versions of this work, see I see a Form, I see a Face.

I SEE A FORM, I SEE A FACE.

TUNE—'THIS IS NO MY AIN HOUSE.'

O this is no my ain lassie,
Fair tho' the lassie be;
O weel ken I my ain lassie,
Kind love is in her ee.

I see a form, I see a face,
Ye weel may wi' the fairest place:
It wants, to me, the witching grace,
The kind love that's in her ee.
O this is no, &c.

She's bonie, blooming, straight, and tall,
And lang has had my heart in thrall;
And aye it charms my very saul,
The kind love that's in her ee.
O this is no, &c.

A thief sae pawkie is my Jean,
To steal a blink, by a' unseen;
But gleg as light are lovers' een,
When kind love is in the ee.
O this is no, &c.

It may escape the courtly sparks,
It may escape the learned clerks;
But weel the watching lover marks
The kind love that's in her ee.
O this is no, &c.