The Poetical Works of Robert Burns/Tibbie, I hae seen the Day

by Robert Burns (1759-1796)

TIBBIE, I HAE SEEN THE DAY.

TUNE—'INVERCAULD'S REEL.'

Chorus
O Tibbie, I hae seen the day,
Ye would na been sae shy;
For laik o' gear ye lightly me,
But, trowth, I care na by.

Yestreen I met you on the moor,
Ye spak na, but gaed by like stoure:
Ye geck at me because I'm poor,
But fient a hair care I.
O Tibbie, I hae, &c.

I doubt na, lass, but ye may think,
Because ye hae the name o' clink,
That ye can please me at a wink,
Whene'er ye like to try.
O Tibbie, I hae, &c.

But sorrow tak him that's sae mean,
Altho' his pouch o' coin were clean,
Wha follows onie saucy quean
That looks sae proud and high.
O Tibbie, I hae, &c.

Altho' a lad were e'er sae smart,
If that he want the yellow dirt,
Ye'll cast your head anither airt,
And answer him fu' dry.
O Tibbie, I hae, &c.

But if he hae the name o' gear,
Ye'll fasten to him like a brier,
Tho' hardly he, for sense or lear
Be better than the kye.
O Tibbie, I hae, &c.

But, Tibbie, lass, tak my advice,
Your daddie's gear maks you sae nice;
The deil a ane wad spier your price,
Were ye as poor as I.
O Tibbie, I hae, &c.

There lives a lass in yonder park,
I would na gie her in her sark,
For thee wi' a' thy thousand mark;
Ye need na look sae high.
O Tibbie, I hae, &c.