The Poetical Works of William Motherwell/And Hae Ye Seen My Ain True Luve?
And Hae Ye Seen My Ain True Luve?
'And hae ye seen my ain true luve
As ye cam thro' the fair?
Ae blink o' her 's worth a' the goud
And gear that glistens there!'—
'And how suld I ken your true luve
Frae ither lasses braw
That trysted there, busked out like queens,
Wi' pearlins knots and a'?'
'Ye may ken her by her snaw-white skin,
And by her waist sae sma;
Ye may ken her by her searchin' ee,
And hair like glossy craw;
Ye may ken her by the hinnie mou,
And by the rose-dyed cheek,
But best o' a' by smiles o' licht
That luve's ain language speak!
'Ye may ken her by her fairy step—
As she trips up the street,
The very pavement seems to shine
Aneath her genty feet!
Ye may ken her by the jewell'd rings
Upon her fingers sma',
Yet better by the dignity
That she glides through them a'.
'And ye may ken her by the voice—
The music o' her tongue—
Wha heard her speak incontinent
Wad think an angel sung!
And such seems she to me, and mair,
That wale o' woman's charms—
It 's bliss to press her dear wee mou
And daut her in my arms!'