Three Scotch songs/Bundle and Go

BUNDLE AND GO.

Out o'er yon mountain and o'er yon lang muir,
There lives a young lassie o' twenty and twa,
And aft I hae ca'd at her auld mithers door,
To try for to wile my dear Mary awa;
But aye she'll say, which maks me so eerie,
I winna, I canna say weel yes or no
In love I'll prove aye true to my dearie,
Although now I munna lad Bundle and Go,

Yestreen at the gloaming beside the haw tree.
While the wee bits o' birdies were making their mane
Wha but the dear lass wi' the blue rolling e'e,
Out o'er the green meadows came tripping her lane
The rose, that blows it wasna sae bonny,
Sae rare sae fair, like twa that did glow,
In hue, sae true are the cheeks o' my honey,
That fain I would hae for to Bundle and Go.

Her saft hair loose on her bare neck like snaw,
Mair white than the lillie that grows on the lea,
But the smile that she gied was the sweetest o' a’.
That glanc'd frae the blink o’ her bonny blue e'e;
Nae care, nae guile, was seen in my Mary,
Nor vain, to pain, my love that did glow,
Her heart to part, and leave Castlecarry.
It whispered refusal to Bundle and Go.

I clasped the dear lasssie, beside the haw bush.
Her sweet cherry lips I kiss'd mony times weel,
While haftlins consenting, a red rosy blush,
It made me believe her heart it was leal;
I press’d, carress'd, fu' snug and fu' cheerie,
My love, my dove, to ease a’ my woe;
I lap she spak', I will be your dearie,
And leave my auld mither and Bundle and Go.

Then Johnny enraptured, nae mair did complain,
Nor she her auld mither did heed ony mair,
But blythely they tripp’d o'er the green dewy plain
As blythe as Auroro a' divested of care;
As gay, as May, sae sweet and sae cheerie,
Sae leal. sae weel, to banish each woe
Her pride, His pride; and each others dearie,
Resolv’d wi' the ither to Bundle and Go,

Now contented they live aye beside the haw tree,
And they auld mither's gotten a but and a beni
And Mary the lass wi the blue rolling e'e,
May do what she likes wi her Johnny ye ken;
Thro' life, his wife, fu' snug and fu’ cheerie,
Aye ready, ane steady, to meet weel or woe,
And never, to sever, but each other's dearie,
Till death gies the word for to Bundle and Go.