Canterbury Tales (ed. Skeat)/Friar

From Wikisource
Jump to navigation Jump to search
1511291The Canterbury Tales — The Freres TaleGeoffrey Chaucer

The Prologe of the Freres tale.

This worthy limitour, this noble Frere,  1265
He made alwey a maner louring chere
Upon the Somnour, but for honestee
No vileyns word as yet to him spak he.
But atte laste he seyde un-to the Wyf,
'Dame,' quod he, 'god yeve yow right good lyf!  1270
Ye han heer touched, al-so moot I thee,
In scole-matere greet difficultee;
Ye han seyd muchel thing right wel, I seye;
But dame, here as we ryden by the weye,  (10)
Us nedeth nat to speken but of game,  1275
And lete auctoritees, on goddes name,
To preching and to scole eek of clergye.
But if it lyke to this companye,
I wol yow of a somnour telle a game.
Pardee, ye may wel knowe by the name,  1280
That of a somnour may no good be sayd;
I praye that noon of you be yvel apayd.
A somnour is a renner up and doun
With mandements for fornicacioun,  (20)
And is y-bet at every tounes ende.'  1285

  Our host tho spak, 'a! sire, ye sholde be hende
And curteys, as a man of your estaat;
In companye we wol have no debaat.
Telleth your tale, and lat the Somnour be.'

  'Nay,' quod the Somnour, 'lat him seye to me  1290
What so him list; whan it comth to my lot,
By god, I shal him quyten every grot.
I shal him tellen which a greet honour  (29)
It is to be a flateringe limitour;  [T. 6876
And his offyce I shal him telle, y-wis.'  [T. 6879

  Our host answerde, 'pees, na-more of this.'  1296
And after this he seyde un-to the Frere,
'Tel forth your tale, leve maister deere.'

Here endeth the Prologe of the Frere.

Here biginneth the Freres tale.

Whilom ther was dwellinge in my contree
An erchedeken, a man of heigh degree,  1300
That boldely dide execucioun
In punisshinge of fornicacioun,
Of wicchecraft, and eek of bauderye,
Of diffamacioun, and avoutrye,
Of chirche-reves, and of testaments,  1305
Of contractes, and of lakke of sacraments,
And eek of many another maner cryme  [T. om.
Which nedeth nat rehercen at this tyme;  [T. om.
Of usure, and of symonye also.  (11)
But certes, lechours dide he grettest wo;  1310
They sholde singen, if that they were hent;
And smale tytheres weren foule y-shent.
If any persone wolde up-on hem pleyne,
Ther mighte asterte him no pecunial peyne.
For smale tythes and for smal offringe,  1315
He made the peple pitously to singe.
For er the bisshop caughte hem with his hook,
They weren in the erchedeknes book.  (20)
Thanne hadde he, thurgh his Iurisdiccioun,
Power to doon on hem correccioun.  1320
He hadde a Somnour redy to his hond,
A slyer boy was noon in Engelond;
For subtilly he hadde his espiaille,
That taughte him, wher that him mighte availle.
He coude spare of lechours oon or two,  1325
To techen him to foure and twenty mo.
For thogh this Somnour wood were as an hare,
To telle his harlotrye I wol nat spare;  (30)
For we been out of his correccioun;
They han of us no Iurisdiccioun,  1330
Ne never shullen, terme of alle hir lyves.

  'Peter! so been the wommen of the styves,'
Quod the Somnour, 'y-put out of my cure!'

  'Pees, with mischance and with misaventure,'
Thus seyde our host, 'and lat him telle his tale.  1335
Now telleth forth, thogh that the Somnour gale,
Ne spareth nat, myn owene maister dere.'

  This false theef, this Somnour, quod the Frere,  (40)
Hadde alwey baudes redy to his hond,
As any hauk to lure in Engelond,  1340
That tolde him al the secree that they knewe;
For hir acqueyntance was nat come of-newe.
They weren hise approwours prively;
He took him-self a greet profit therby;
His maister knew nat alwey what he wan.  1345
With-outen mandement, a lewed man
He coude somne, on peyne of Cristes curs,
And they were gladde for to fille his purs,  (50)
And make him grete festes atte nale.
And right as Iudas hadde purses smale,  1350
And was a theef, right swich a theef was he;
His maister hadde but half his duëtee.
He was, if I shal yeven him his laude,
A theef, and eek a Somnour, and a baude.
He hadde eek wenches at his retenue,  1355
That, whether that sir Robert or sir Huwe,
Or Iakke, or Rauf, or who-so that it were,
That lay by hem, they tolde it in his ere;  (60)
Thus was the wenche and he of oon assent.
And he wolde fecche a feyned mandement,  1360
And somne hem to the chapitre bothe two,
And pile the man, and lete the wenche go.
Thanne wolde he seye, 'frend, I shal for thy sake
Do stryken hir out of our lettres blake;
Thee thar na-more as in this cas travaille;  1365
I am thy freend, ther I thee may availle.'
Certeyn he knew of bryberyes mo
Than possible is to telle in yeres two.  (70)
For in this world nis dogge for the bowe,
That can an hurt deer from an hool y-knowe,  1370
Bet than this Somnour knew a sly lechour,
Or an avouter, or a paramour.
And, for that was the fruit of al his rente,
Therfore on it he sette al his entente.

  And so bifel, that ones on a day  1375
This Somnour, ever waiting on his pray,
Rood for to somne a widwe, an old ribybe,
Feynynge a cause, for he wolde brybe.  (80)
And happed that he saugh bifore him ryde
A gay yeman, under a forest-syde.  1380
A bowe he bar, and arwes brighte and kene;
He hadde up-on a courtepy of grene;
An hat up-on his heed with frenges blake.

  'Sir,' quod this Somnour, 'hayl! and wel a-take!'
'Wel-come,' quod he, 'and every good felawe!  1385
Wher rydestow under this grene shawe?'
Seyde this yeman, 'wiltow fer to day?'

  This Somnour him answerde, and seyde, 'nay;  (90)
Heer faste by,' quod he, 'is myn entente
To ryden, for to reysen up a rente  1390
That longeth to my lordes duëtee.

  'Artow thanne a bailly?' 'Ye!' quod he.
He dorste nat, for verray filthe and shame,
Seye that he was a somnour, for the name.

  'Depardieux,' quod this yeman, 'dere brother,  1395
Thou art a bailly, and I am another.
I am unknowen as in this contree;
Of thyn aqueyntance I wolde praye thee,  (100)
And eek of brotherhede, if that yow leste.
I have gold and silver in my cheste;  1400
If that thee happe to comen in our shyre,
Al shal be thyn, right as thou wolt desyre.'

  'Grantmercy,' quod this Somnour, 'by my feith!'
Everich in otheres hand his trouthe leith,
For to be sworne bretheren til they deye.  1405
In daliance they ryden forth hir weye.

  This Somnour, which that was as ful of Iangles,
As ful of venim been thise wariangles,  (no)
And ever enquering up-on every thing,
'Brother,' quod he, 'where is now your dwelling,  1410
Another day if that I sholde yow seche?'

  This yeman him answerde in softe speche,
'Brother,' quod he, 'fer in the north contree,
Wher, as I hope, som-tyme I shal thee see.
Er we departe, I shal thee so wel wisse,  1415
That of myn hous ne shaltow never misse.'

  'Now, brother,' quod this Somnour, 'I yow preye,
Teche me, whyl that we ryden by the weye,  (120)
Sin that ye been a baillif as am I,
Som subtiltee, and tel me feithfully  1420
In myn offyce how I may most winne;
And spareth nat for conscience ne sinne,
But as my brother tel me, how do ye?'

  'Now, by my trouthe, brother dere,' seyde he,
'As I shal tellen thee a feithful tale,  1425
My wages been ful streite and ful smale.
My lord is hard to me and daungerous,
And myn offyce is ful laborous;  (130)
And therfore by extorcions I live.
For sothe, I take al that men wol me yive;  1430
Algate, by sleyghte or by violence,
Fro yeer to yeer I winne al my dispence.
I can no bettre telle feithfully.'

  'Now, certes,' quod this Somnour, 'so fare I;
I spare nat to taken, god it woot,  1435
But-if it be to hevy or to hoot.
What I may gete in conseil prively,
No maner conscience of that have I;  (140)
Nere myn extorcioun, I mighte nat liven,
Ne of swiche Iapes wol I nat be shriven.  1440
Stomak ne conscience ne knowe I noon;
I shrewe thise shrifte-fadres everichoon.
Wel be we met, by god and by seint Iame!
But, leve brother, tel me than thy name,'
Quod this Somnour; and in this mene-whyle,  1445
This yeman gan a litel for to smyle.

  'Brother,' quod he, 'wiltow that I thee telle?
I am a feend, my dwelling is in helle.  (150)
And here I ryde about my purchasing,
To wite wher men wolde yeve me any thing.  1450
My purchas is theffect of al my rente.
Loke how thou rydest for the same entente,
To winne good, thou rekkest never how;
Right so fare I, for ryde wolde I now
Un-to the worldes ende for a preye.'  1455

  'A,' quod this Somnour, 'benedicite, what sey ye?
I wende ye were a yeman trewely.
Ye han a mannes shap as wel as I;  (160)
Han ye figure than determinat
In helle, ther ye been in your estat?'  1460

  'Nay, certeinly,' quod he, 'ther have we noon;
But whan us lyketh, we can take us oon,
Or elles make yow seme we ben shape
Som-tyme lyk a man, or lyk an ape;
Or lyk an angel can I ryde or go.  1465
It is no wonder thing thogh it be so;
A lousy Iogelour can deceyve thee,
And pardee, yet can I more craft than he.'  (170)

  'Why,' quod the Somnour, 'ryde ye thanne or goon
In sondry shap, and nat alwey in oon?'  1470

  'For we,' quod he, 'wol us swich formes make
As most able is our preyes for to take.'

  'What maketh yow to han al this labour?'

  'Ful many a cause, leve sir Somnour,'
Seyde this feend, 'but alle thing hath tyme.  1475
The day is short, and it is passed pryme,
And yet ne wan I no-thing in this day.
I wol entende to winnen, if I may,  (180)
And nat entende our wittes to declare.
For, brother myn, thy wit is al to bare  1480
To understonde, al-thogh I tolde hem thee.
But, for thou axest why labouren we;
For, som-tyme, we ben goddes instruments,
And menes to don his comandements,
Whan that him list, up-on his creatures,  1485
In divers art and in divers figures.
With-outen him we have no might, certayn,
If that him list to stonden ther-agayn.  (190)
And som-tyme, at our prayere, han we leve
Only the body and nat the soule greve;  1490
Witnesse on Iob, whom that we diden wo.
And som-tyme han we might of bothe two,
This is to seyn, of soule and body eke.
And somtyme be we suffred for to seke
Up-on a man, and doon his soule unreste,  1495
And nat his body, and al is for the beste.
Whan he withstandeth our temptacioun,
It is a cause of his savacioun;  (200)
Al-be-it that it was nat our entente
He sholde be sauf, but that we wolde him hente.  1500
And som-tyme be we servant un-to man,
As to the erchebisshop Seint Dunstan,
And to the apostles servant eek was I.'

  'Yet tel me,' quod the Somnour, 'feithfully,
Make ye yow newe bodies thus alway  1505
Of elements?' the feend answerde, 'nay;
Som-tyme we feyne, and som-tyme we aryse
With dede bodies in ful sondry wyse,  (210)
And speke as renably and faire and wel
As to the Phitonissa dide Samuel.  1510
And yet wol som men seye it was nat he;
I do no fors of your divinitee.
But o thing warne I thee, I wol nat Iape,
Thou wolt algates wite how we ben shape;
Thou shalt her-afterward, my brother dere,  1515
Com ther thee nedeth nat of me to lere.
For thou shalt by thyn owene experience
Conne in a chayer rede of this sentence  (220)
Bet than Virgyle, whyl he was on lyve,
Or Dant also; now lat us ryde blyve.  1520
For I wol holde companye with thee
Til it be so, that thou forsake me.'

  'Nay,' quod this Somnour, 'that shal nat bityde;
I am a yeman, knowen is ful wyde;
My trouthe wol I holde as in this cas.  1525
For though thou were the devel Sathanas,
My trouthe wol I holde to my brother,
As I am sworn, and ech of us til other  (230)
For to be trewe brother in this cas;
And bothe we goon abouten our purchas.  1530
Tak thou thy part, what that men wol thee yive,
And I shal myn; thus may we bothe live.
And if that any of us have more than other,
Lat him be trewe, and parte it with his brother.'

  'I graunte,' quod the devel, 'by my fey.'  1535
And with that word they ryden forth hir wey.
And right at the entring of the tounes ende,
To which this Somnour shoop him for to wende,  (240)
They saugh a cart, that charged was with hey,
Which that a carter droof forth in his wey.  1540
Deep was the wey, for which the carte stood.
The carter smoot, and cryde, as he were wood,
'Hayt, Brok! hayt, Scot! what spare ye for the stones?
The feend,' quod he, 'yow fecche body and bones,
As ferforthly as ever were ye foled!  1545
So muche wo as I have with yow tholed!
The devel have al, bothe hors and cart and hey!'

  This Somnour seyde, 'heer shal we have a pley;'  (250)
And neer the feend he drough, as noght ne were,
Ful prively, and rouned in his ere:  1550
'Herkne, my brother, herkne, by thy feith;
Herestow nat how that the carter seith?
Hent it anon, for he hath yeve it thee,
Bothe hey and cart, and eek hise caples three.'

  'Nay,' quod the devel, 'god wot, never a deel;  1555
It is nat his entente, trust me weel.
Axe him thy-self, if thou nat trowest me,
Or elles stint a while, and thou shall see.'  (260)

  This carter thakketh his hors upon the croupe,
And they bigonne drawen and to-stoupe;  1560
'Heyt, now!' quod he, 'ther Iesu Crist yow blesse,
And al his handwerk, bothe more and lesse!
That was wel twight, myn owene lyard boy!
I pray god save thee and sëynt Loy!
Now is my cart out of the slow, pardee!'  1565

  'Lo! brother,' quod the feend, 'what tolde I thee?
Heer may ye see, myn owene dere brother,
The carl spak oo thing, but he thoghte another.  (270)
Lat us go forth abouten our viage;
Heer winne I no-thing up-on cariage.'  1570

  Whan that they comen som-what out of toune,
This Somnour to his brother gan to roune,
'Brother,' quod he, 'heer woneth an old rebekke,
That hadde almost as lief to lese hir nekke
As for to yeve a peny of hir good.  1575
I wol han twelf pens, though that she be wood,
Or I wol sompne hir un-to our offyce;
And yet, god woot, of hir knowe I no vyce.  (280)
But for thou canst nat, as in this contree,
Winne thy cost, tak heer ensample of me.'  1580

  This Somnour clappeth at the widwes gate.
'Com out,' quod he, 'thou olde viritrate!
I trowe thou hast som frere or preest with thee!'

  'Who clappeth?' seyde this widwe, 'benedicite!
God save you, sire, what is your swete wille?'  1585

  'I have,' quod he, 'of somonce here a bille;
Up peyne of cursing, loke that thou be
To-morn bifore the erchedeknes knee  (290)
Tanswere to the court of certeyn thinges.'

  'Now, lord,' quod she, 'Crist Iesu, king of kinges,  1590
So wisly helpe me, as I ne may.
I have been syk, and that ful many a day.
I may nat go so fer,' quod she, 'ne ryde,
But I be deed, so priketh it in my syde.
May I nat axe a libel, sir Somnour,  1595
And answere there, by my procutour,
To swich thing as men wol opposen me?'

  'Yis,' quod this Somnour, 'pay anon, lat se,  (300)
Twelf pens to me, and I wol thee acquyte.
I shall no profit han ther-by but lyte;  1600
My maister hath the profit, and nat I.
Com of, and lat me ryden hastily;
Yif me twelf pens, I may no lenger tarie.'

  'Twelf pens,' quod she, 'now lady Seinte Marie
So wisly help me out of care and sinne,  1605
This wyde world thogh that I sholde winne,
Ne have I nat twelf pens with-inne myn hold.
Ye knowen wel that I am povre and old;  (310)
Kythe your almesse on me povre wrecche.'

  'Nay than,' quod he, 'the foule feend me fecche  1610
If I thexcuse, though them shul be spilt!'

  'Alas,' quod she, 'god woot, I have no gilt.'

  'Pay me,' quod he, 'or by the swete seinte Anne,
As I wol bere awey thy newe panne
For dette, which that thou owest me of old,  1615
Whan that thou madest thyn housbond cokewold,
I payde at hoom for thy correccioun.'

  'Thou lixt,' quod she, 'by my savacioun!  (320)
Ne was I never er now, widwe ne wyf,
Somoned un-to your court in al my lyf;  1620
Ne never I nas but of my body trewe!
Un-to the devel blak and rough of hewe
Yeve I thy body and my panne also!'

  And whan the devel herde hir cursen so
Up-on hir knees, he seyde in this manere,  1625
'Now Mabely, myn owene moder dere,
Is this your wil in ernest, that ye seye?'

  'The devel,' quod she, 'so fecche him er he deye,  (330)
And panne and al, but he wol him repente!'

  'Nay, olde stot, that is nat myn entente,'  1630
Quod this Somnour, 'for to repente me,
For any thing that I have had of thee;
I wolde I hadde thy smok and every clooth!'

  'Now, brother,' quod the devel, 'be nat wrooth;
Thy body and this panne ben myne by right.  1635
Thou shalt with me to helle yet to-night,
Where thou shalt knowen of our privetee
More than a maister of divinitee:'  (340)
And with that word this foule feend him hente;
Body and soule, he with the devel wente  1640
Wher-as that somnours han hir heritage.
And god, that maked after his image
Mankinde, save and gyde us alle and some;
And leve this Somnour good man to bicome!

  Lordinges, I coude han told yow, quod this Frere,  1645
Hadde I had leyser for this Somnour here,
After the text of Crist [and] Poul and Iohn
And of our othere doctours many oon,  (350)
Swiche peynes, that your hertes mighte agryse,
Al-be-it so, no tonge may devyse,  1650
Thogh that I mighte a thousand winter telle,
The peyne of thilke cursed hous of helle.
But, for to kepe us fro that cursed place,
Waketh, and preyeth Iesu for his grace
So kepe us fro the temptour Sathanas.  1655
Herketh this word, beth war as in this cas;
The leoun sit in his await alway
To slee the innocent, if that he may.  (360)
Disposeth ay your hertes to withstonde
The feend, that yow wolde make thral and bonde.  1660
He may nat tempten yow over your might;
For Crist wol be your champion and knight.
And prayeth that thise Somnours hem repente
Of hir misdedes, er that the feend hem hente.

Here endeth the Freres tale.

Skeat's Notes and Variae Lectiones

Heading. So E. Hn.—1266. E. chiere.—1267. E. Somonour; Hn. Somnour.—1273. E. Hn. muche; Ln. muchel; rest mochel.—1274. E. ryde; rest ryden.—1277. Hl. scoles.—E. Hn. Hl. om. eek.—1278. K. And; rest But.—1284. E. Hn. mandementz.—1286. Hl. oste (om. tho).—After l. 1294 all but Hl. wrongly insert ll. 1307 and 1308; which see. Tyrwhitt also inserts them.—1298. E. Hn. leeue; Hl. my; Cp. Ln. my leue; Pt. my owen.—Colophon. From Hn.; so Pt.(with Thus for Here).—Heading. So E. Pt.—1306. E. Hn. and eek; rest and.—1307, 1308. Wrongly inserted after l. 1294 in all but Hl.—1307. E. Hn. Ln. om. eek.—1308. E. Hn. for; rest at.—1310. Ln. lychoures; rest lecchours.—1315. Hn. Hl. for; Cp. eek for; Pt. Ln. eek; E. om.—1317. E. Hl. him.—1318. Cp. Pt. Hl. weren; rest were.—1319. Hl. And; rest And thanne; read Thanne.—1321. E. Somonour; Hl. Sompnour; rest Somnour.—1322. E. Pt. Ln. boye.—1324. Read taughten(?), or taught-e.—Cp. Pt. that; rest om.—1325. E. lecchours.—1327. E. was; rest were.—1331. E. Hn. om. alle.—1332. E. Cm. om. 1st the.—1343. Ln. approwers; Cm. apprououris; Pt. aprouers; rest approuwours.—1348. Cp. gladde; E. Hn. glade.—1349. Cm. at the nale; (atte nale = atten ale).—1352. Hl. not (for but).—Cp. dewete.—1356. E. wheither.—1364. E. Hn. hir; rest þe.—1367. E. bribryes.—1370. Hl. y-knowe; rest knowe [perhaps read hole knowe).—1371. Cm. lechour; E. Hn. lecchour.—1372. Hn. Cp. Pt. auouter; E. Hl. auowtier.—1377. Hl. Rod; Cp. Pt. Ln. Rode; Cm. Wente; E. Hn. om.—Cm. a wedewe an old; Hl. a widew and(!) old; E. Hn. an old wydwe a.—1379. E. And—1386. E. Cm. Pt. Ln. grene wode shawe (too long).—1391. Cp. dewete.—1395. Cm. leue; Hl. lieue; rest dere (deere).—1399. Cm. brotherhode; Hl. brotherheed; rest brether-.—1405. Hl. sworne; E. Hn. sworn; rest swore.—1407. E. Cm. om. which.—1421. Cp. Pt. Ln. Hl. how that I.—1426. Hl. and eek (but read streit-e).—1428. Cp. laborious; rest laborous.—1430. E. yeue.—1440. E. Nor; Hn. Cm. Hl. Ne.—1444. E. thanne.—1445. Cm. and; rest om.—1450. E. me yeuen; rest yeue (yiue) me.—1454. E. I wolde right; Hl. I wolde; rest wolde I.—1459. E. thanne.—1471. E. Hn. swiche; Cm. Cp. swich.—1479. E. hir; rest oure.—Cm. wordis; Hl. thinges; rest wittes.—1486. E. Hn. Cm. diuerse (2nd time).—1496. body] E. soule(!).—1498. E. om. a; Cm. the.—1502. E. bisshop(!).—1515. E Hn. -wardes; rest -ward.—1528, 1533. E. oother.—1531. E. Taak; yeue.—1556. E. Hn. trust thou; rest om. thou.—1559. Cm. thakkyth; Hl. thakketh; Ln. thakkes; Cp. Pt. thakked; E. Hn. taketh.—Hn. Cm. Hl. upon; rest om.—1562. Cp. hondywerk; Hn. handes werk.—1564. E. to god; rest om. to.—1565. Cp. slough; Pt. schlough; Ln. slouhe; Hl. sloo.—1568. E. Hl. oon; Cm. on; rest o (oo). E. om. thing.—1571. E. coomen.—1582. Hn. Cp. Hl. viritrate; E. virytrate; Cm. verye crate; Pt. viritate; Ln. veritate.—1584. Cm. widew; Hl. widow; rest wyf (but read ben'cite).—1586. Cp. Pt. Ln. here; rest om.—1587. E. Vp-on; rest Vp.—1589. E. Hn. Tanswere; rest To answere (answer).—1596. Hl. ther; Ln. the; rest there.—Hl. procuratour; Cm. Ln. procatour; rest procutour.—1605. E. Hn. me god; rest om. god.—1610. E. thanne.—1626. Cm. Mabelyn.—1642. Hl. maked; rest made.—1644. E. Hn. this Somonours goode men bicome.—1647. I supply and.—1649. E. Ln. Hl. herte (see l. 1659).—1650. E. Hn. may it; rest om. it.—1652. E. Hn. Pt. peynes; rest peyne.—1661. E. Hn. Hl. tempte; rest tempten.—1663. So E. Hn.; Cp. Pt. Ln. this somnour him; Hl. oure sompnour him.—1664. So E. Hn.; rest his mysdede ... him.—Cm. om. that (perhaps rightly).—Colophon. So E. Hn. Cm.; Cp. Hl. Her endeth the Frere his tale.