INTERROGATIO SIGEUULFI PRESBITERI
Sum geþungen lareow wæs on engla lande albinus gehaten · ⁊ hæfde mẏcele geþíngða · Se lærde manega þæs engliscan mennisces on boclicū cræfte . swa swa he wel cuþe · ⁊ ferde sẏððan ofer sǽ to þā snóteran cẏnínge carolus geháten · se hæfde mẏcelne cræft for gode ⁊ for worulde · ⁊ he wislice leofode. To þā com albinus se æþela lareow . ⁊ on his anwealde ælþeodig wunode . on scè martines mynstre · ⁊ þær manega gelærde mid þā heofonlicon wisdome þe him se hæland forgeaf · Þa on sumne timan sigewulf mæssepreost hine befran gelome feorran mid gewritum be gehwẏlcū cnottum þe he sylf ne cúþe on þære halgan béc þe is geháten genesis: Þa cwæð albinus him to andsware . þæt he wolde his axunga ealle gegaderian · ⁊ hím andsware sendan mid heora swutelungean: Sigewulf hine befran atfruman þisū wordū: Hu is to understandanne . þæt se ælmihtiga god geswac his weorca on þam seofoþan dæge . þaþa
