Page:Beowulf (Wyatt).djvu/51

615ond þā frēolic wīf⁠ful gesealde
ǣrest Ēast-Dena⁠ēþel-wearde,
bæd hine blīðne⁠æt þǣre bēor-þege,
lēodum lēofne;⁠hē on lust geþeah
symbel ond sele-ful,⁠sige-rōf kyning.
620Ymb-ēode þa⁠ides Helminga
duguþe ond geogoþe⁠dǣl ǣghwylcne,
sinc-fato sealde,⁠oþ þæt sǣl ālamp,
þæt hīo Bēowulfe,⁠bēag-hroden cwēn,
mōde geþungen,⁠medo-ful ætbær;
625grētte Gēata lēod,⁠Gode þancode
wīs-fæst wordum,⁠þæs ðe hire se willa gelamp,
þæt hēo on ǣnigne⁠eorl gelȳfde
fyrena frōfre.⁠He þæt ful geþeah,
wæl-rēow wiga,⁠*æt Wealhþēon,Fol. 144b.
630ond þā gyddode⁠gūþe gefȳsed;
Bēowulf maþelode,⁠bearn Eegþēowes:
“Ic þæt hogode,⁠þā ic on holm gestāh,
sǣ-bāt gesæt⁠mid mīnra secga gedriht,
þæt ic ānunga⁠ēowra lēoda
635willan geworhte,⁠oþðe on wæl crunge
fēond-grāpum fæst.⁠Ic gefremman sceal
eorlīc ellen,⁠oþðe ende-dæg
on þisse meodu-healle⁠mīnne gebīdan.”
Ðām wīfe þā word⁠wel līcodon,
640gilp-cwide Gēates;⁠ēode gold-hroden
frēolicu folc-cwēn⁠tō hire frēan sittan.
̄Þā wæs eft swā ǣr⁠inne on healle
þrȳð-word sprecen,⁠ðēod on sǣlum,
sige-folca swēg,⁠oþ þæt semninga
645sunu Healfdenes⁠sēcean wolde
ǣfen-ræste;⁠wiste þǣm āhlǣcan