⁊ nu, hit (2a) tostreigdeð ⁊ todæleð hit sylf ymb oðerra manna wisan for nydþearfe manigra manna, witodlice þonne hit wile ymb his agene þæncan, buton tweon hit gehweorfeþ þy medmare to his sylfes þearfe. genoh georne ic gehycge, þæt ic dreoge, ⁊ hwet ic anforlet. ⁊ symble þonne ic geþence, þæt ic ær forleas þa dyglan stowe, me þinceþ þis þy hefigre, þæt ic nu ræfnige. geseoh nu, Petrus, þæt me is gelicost þam, þe on lefan scipe byð, þat byð geswenced mid þam yþum mycclan sæs: swa ic eom nu onstyred mid þam gedrefednyssum þissere worulde, ⁊ ic eom gecnyssed mid þam stormum þære strangan hreohnesse in þam scipe mines modes. ⁊ þonne ic gemune mines þæn ærran lifes, þe ic on mynstre ær on wunode, þonne asworette ic ⁊ geomrige gelice þam, þe on lefan scipe neah lande gelætað, ⁊ hit þonne se þoden ⁊ se storm on sæ adrifeð swa feorr, swa he æt nyhstan nænig land geseon ne mæg. ⁊ eac me þynceþ, þæt nu gyt mycele hefigre sy, þæt, þonne ic beo gealegen ⁊ gedrefed mid þam
⁊ nu, þonne hit todælð hit sylf to þam yttrum þingum for nedþearfe manigra manna, witodlice þonne hit wile ymbe his (2a) agenne þencean, untwylice hit gehwyrfð þe læs to his sylfes þearfe. genoh georne ic geþence, hwæt ic nu dreoge, ⁊ eac hwæt ic anforlet. ⁊ simle þonne ic geþence, hwæt ic ær forleas þa diglan stowe, me þingþ þis þa hefigre, þæt ic þolige. geþenc nu, Petrus, þat me is geliccost þam, þe bið on lefan scipe, þe byð geswenced mid sælicum yðum: swa ic eom nu onstyred mid þam gedrefednyssum þysre worulde, ⁊ ic eom gecnyssed mid þam stormum þære strangan hreohnysse on þam scipe mines modes. ⁊ þonne ic geman mines ærran lifes, þe ic on mynstre ær on wunode, þonne asworette ic ⁊ ageomrige gelice þam, þe on lefan scipe neah lande gelætað, ⁊ hit þonne se þoden ⁊ se storm ut adrifað swa feor, þæt hy æt necstan ne magon nan land geseon. ⁊ eac me þingð, þæt sy nu gyt mycele hefigre, þæt, þonne ic beo geslegen ⁊ gedrefed mit þam
