¶How yowre hawke puttithouer
An hawke puttithoueꝛ when ſhe remeuith the mete from hir gooꝛge in to hiꝛ bowillis. And thus ye ſhall knowe it whan ſhe puttithouer ſhe traueꝛſith withe hiꝛ bodi, and ſpecialli with the necke: as a Crane doothe oꝛ an otheꝛ bridde
¶whan ye ſhall ſay enduth ⁊ embowellid
An hawke enduth neuer as long as hir bowillis bene full at heꝛ fedyng, bot aſſone as ſhe is fedde, and reſtith ſhe enduthe littill and littill. And if her gooꝛge be wide and the bowell any thyng ſtiffid, ye ſhall ſay ſhe is embowellid and hath not fully endewed, and as long as ye may fele any thyng in hiꝛ bowellis it is peꝛlous to gyue heꝛ any mete.
¶Merke well theys termys folowyng.
Say an hawke hath a long wyng, a faire long tayll with vi baꝛris owt, and ſtondith vppon the vij. This hawke is entiꝛpenned That is to ſay when the federis of the wynges bene bitwen the body and the thighis. This hawke has an hudge legge oꝛ a flat leg, oꝛ a rownde legge, oꝛ a faire enſerid legge
¶To knawe the maill of an hawke.
Hawkes haue white maill, Canuaſmaill oꝛ Rede maill. And ſom call Rede maill Iren mayll, white maill is ſoone knawe. Canuaſmaill is betwene white maill and Iron maill. And Iron maill is varri Rede.
