folde. as a bowſtryng vnocupyede and the terettye ſeꝛue to kepe hiꝛ from wyndyng whan ſhe bathes ¶Alſo theſſame letheris that he putt in hiꝛ bellis: to be faſtyned a boute hiꝛ leggys ye ſhall calle Bewettis.
ALſo ye ſhall call the long lyne that ye do call youre hawke to Reclaym with: yowre Creaunce. what ſo eueꝛ it be.
¶A medecyne foꝛ an hawke that will caſt fleſh
Putt the fleſh that yowre hawke ſhall eete: in fayre wateꝛ. and fede heꝛ theꝛwith .iij. days. and ſhe ſhall holde hiꝛ fleſh at the beſt.
¶A medecyne foꝛ an hawke that has loſt heꝛe coꝛrage.
An hawke that hath looſt heꝛ coꝛrage: aman may knawe it he will take good hede. Foꝛ ſiche is hiꝛ maneꝛ. whan ſhe is caſt to a fowle. ſhe fleith a waywaꝛde as thogh ſhe knewe nott the fowle. Oꝛ ellis ſhe will flie a littyll way afteꝛ. and a noon ſhe yeueth it vpp: and foꝛ ſuche an hawke thys is a goode medecyn.
