Even thay puir cogs are as toom as before, and my puir idiot as hungry. Hast tu had ony thing, Wilkin? (Turns round to him and discoversBawldy.) Ha! wha has tu wi' thee? (ToBawldy.) What brought thee here, in a mischief to thee! Thou's Dungarren's herd, I reckon.
BAWLDY.
I came frae the tower of Dungarren wi' an errand, I wou'd hae ye to wit.
MARY MACMURREN.
Tell thy errand, then, and no lurk that gate, in a nook, like a thoumart in a dowcot: for if tu be come here without an errand, thou shalt rue it dearly to the last hour o' thy life.
BAWLDY.
Isna this Grizeld Bane's house?
MARY MACMURREN.
No, silly loon! it's my house. She's but a rinagate rawny, frae far awa' parts, that came to be my lodger. Ay; and she may gang as she came, for me: I'll no harbour her ony mair. Nae mair Grizeld Banes in my house, to reeve an' to herrie me sae! She maun pack aff wi' hersel this very day.
