Up in the Morning early.
Cauld blaws the win’ frae north to south,
an’ drift is driving sairly;
The sheep is couring in the heugh,
O Sirs! it’s Winter fairly.
Now up in the morning’s no for me.
up in the morning early;
I’d rather gae supperless to my bed,
than rise in the morning early.
Rude rairs the blast amang the woods,
the branches tirlin’ barely;
Amang the chimney-taps it thuds,
an’ frost is nippin’ sairly.
Now up in the morning’s no for me,
up in the morning early;
To sit a’ the night wad better agree;
than rise in the morning early.
The Sun peeps o’er the Southlan’ hills,
like ony timerous carlie,
Just brinks a wee, then sinks again,
an’ that we fin’ severely.
Now up in the morning’s no for me,
up in the morning early;
When snaw blaws in to the chimley-cheek,
wha’d rise in the morning early?
Nae Linties lilt on liedge or bush,
poor things they suffer sairly,
In cauldrife quarters a’ the night,
a’ day they feed but sparely.