kepe your perſone / and your Royalme / And thenne the kynge ſayd thow arte a good man / I wylle that thow be my grete ſtyward of my houſhold / and that euery one here to the honour and reuerence / And whan the man of trouthe herd alle this he ſayd to hym ſelf / yf this man for to haue made leſynges is ſoo gretely enhaunced / thenne by gretter rayſon / I ſhalle be more worſhipped and enhaunced / yf I ſaye trouthe /¶ And after the kynge wold aſke the trewe man / and demaunded of hym / who am I / and alle that ben aboute me / And thenne the man of trouthe anſuerd thus to hym / thow arte an ape and a beſte ryght abhomynable / And alle they whiche ben aboute the are lyke and ſemblable to the /¶ The kynge thenne commaunded that he ſhold be broken and toren with teeth and clawes and put alle in to pycees / And therfore it happeth ofte that the lyers and flaterers ben enhauced[errata 1] / and the men of trouthe ben ſet alowe and put aback / For oftyme for to ſaye trouthe men leſe theyre lyues / the whiche thynge is ageynſt Iuſtyce and equyte
