the lambes beganne alle to flee / but the bore as prowd wold not ſtere hym / ne go fro the place / by cauſe he ſuppoſed to be lord / but the wulf toke hym / and bare hym in to the wode for to ete hym / ¶ And as the wulf bare hym / it happed that he parted before the herd of ſwynes / whiche the bore had lefte / ¶ And thenne whanne the bore perceyued and knewe them / he prayd and cryed to them / that for the loue of god they wold helpe hym / And that withoute her help / he was deed / And thenne the ſwynes alle of one aſſent and owne wylle wente and recouered theyr felewe / and after ſlewe the wulf / And as the bore was delyuerd / and ſawe hym amonge the ſwynes / and that alle his doubte and fere was gone / he beganne to haue vergoyne and ſhame / by cauſe that he was thus departed / and gone fro theyr felauſhip and ſayd to them / My bretheren and my frendes / I am well worthy to haue had this payne / by cauſe / I was gone & departed from yow / And therfore he that is wel / lete hym beware that he moue not hym ſelf / For ſuche by his pryde deſyreth to be a grete lord / whiche ofte falleth in grete pouerte /
