¶ The ſecond ſayd I ſuppoſe wel / that the mylle ſhalle be myn / For yf I had faſted twenty yere / And yf I hadde come to a table couerd of al maner of precious and delyate metes / therof I myght wel ete yf I wold take of the beſt / I am ſo ſlothfull that I maye not ete Withoute one ſhold putte the mete in to my mouthe /
¶ And the thyrde ſayd / the mylle ſhalle be myn / For I am yet a gretter lyar and more ſlouthfull / than ony of yow bothe / For yf I hadde ben athurst vnto the dethe / And yf I found thenne my ſelf within a fayre water into the neck / I wold rather deye / than to meue ones my heed for to drynke therof only one drop / ¶ Thenne ſayd the Juge to them / Ye wote not what ye ſaye / For I nor none other maye not wel vnderſtande yow / But the cauſe I remytte and put amonge yow thre / And thus they wente withoute ony ſentence / For to folyſſhe demaunde behoueth a folyſſhe anſuere.
¶ And therfore they ben fooles that wylle plete ſuche vanyte one ageynſte other/ And many one ben fallen therfore in grete pouerte / For for a lytyl thynge ought to be made a lytyl plee
