beganne to flee / For they wend / that it had be the lyon / And the mayſter of the aſſe ſerched and ſoughte his aſſe in euery place al aboute And as he had ſoughte longe / he thoughte that he wold go in to the foreſt for to ſee yf his aſſe were there / And as ſoone as he was entryd in to the foreſt / he mette with his aſſe arayed as before is ſayd / but his mayſter whiche had ſoughte hym longe ſawe his erys / wherfore he knewe hym wel / and anone toke hym / and ſayd in this manere / Ha a mayſter aſſe / arte thow clothed with the ſkynne of the lyon / thow makeſt the beſtes to be aferd / but yf they knewe the / as wel as I do / they ſhold haue no fere of the / but I enſure the / that wel I ſhalle bete the therfore / And thenne he toke fro hym the ſkynne of the lyon / and ſayd to hym Lyon ſhalt thow be no more / but an aſſe ſhalt thow euer be / And his mayſter tooke thenne a ſtaf / and ſmote hym / ſoo that euer after he remembryd hym wel of hit / And therfore he whiche auaunceth hym ſelf of other mennes goodes is a very foole / For as men ſayn comynly he is not wel arayed nor wel appoynted / whiche is clothed with others gowne / ne alſo it is not honeſte to make large thonges of other mennes leder
